Joe Higgins

Ón Vicipéid, an chiclipéid shaor.
Joe Higgins

Is polaiteoir Éireannach é Joe Higgins (Gaeilge: Seosamh Ó hUiginn). Rugadh é ar an 1 Bealtaine 1949. Ba é Higgins an t-aon Teachta Dála ón Pháirtí Sóisialach idir 1997 agus 2007. Chaill sé a shuíochán san olltoghchán sa bhliain 2007.

Rugadh é i Lios Póil i gContae Ciarraí sa bhliain 1949. D'fhreastail sé ar Scoil na mBráithre Chríostaí sa Daingean. I ndiaidh sin, thosaigh sé ag staidéar chun bheith ina shagart. Cuireadh go dtí coláiste cléireach i Minnesota sna Stáit Aontaithe san 1960í é mar chuid dá chuid oiliúna. Bhí agóidí frith-Chogadh Vitneaim agus an feachtas Chearta Sibhialta ar siúl ag an am agus bhí tionchar acu siúd ar a dhearcadh polaitiúil.

D'fhill sé go hÉireann agus bhain sé céim amach sa Bhéarla agus sa Fhraincís i gColáiste na hOllscoile, Baile Átha Cliath. Chaith sé tamall ag múineadh i scoileanna lárchathracha i mBaile Átha Cliath. Chuaigh sé isteach i bPáirtí an Lucht Oibre nuair a bhí sé mar mhac léinn agus bhí sé gníomhach sa Militant Tendency (An Claonadh Míleatach), grúpa den eite chlé sa pháirtí. Dibríodh Higgins agus daoine eile san Militant Tendency sa bhliain 1989. Bhunaigh siad Militant Labour ach thosaigh an páirtí ar úsáid a bhaint as an ainm "An Páirtí Sóisialach" sa bhliain 1996.

Toghadh Higgins mar bhall de Chomhairle Chontae Fhine Gall sa bhliain 1991 agus bhí sé ina bhall den Chomhairle go dtí 2004. Toghadh é mar Theachta Dála sa bhliain 1997 i nDáilcheantar Bhaile Átha Cliath Thiar. Toghadh arís é in Olltoghchán 2002. Chaill sé a shuíochán sa bhliain 2007 ach d'éirigh leis é a bhuachan arís in Olltoghchán 2011, tar éis dó a bheith tofa mar Fheisire de chuid Pharlaimint na hEorpa ar son Bhaile Átha Cliath i 2009.

Chaith sé mí i bpríosún sa bhliain 2003 mar gheall ar agóidí i gcoinne táillí ar bhailiúchán bruscar tí. Bhí sé gníomhach i gcónaí ar son chearta na n-inimirceach freisin. Do thoghchán ginearálta 2011 tháinig aontas coiteann de chuid na heite clé, darbh ainm Comhghuaillíocht na hEite Clé Aontaithe le chéile le dul in iomaíocht leis na páirtithe eile.



Feisirí Pharlaimint na hEorpa do Bhaile Átha Cliath
Gabriel De Mhistéal | Proinsias De Rossa | Joe Higgins



Feisirí Pharlaimint na hEorpa do Phoblacht na hÉireann (2009-2014)
Liam Aighleart | Nessa Childers | Gabriel De Mhistéal | Proinsias De Rossa | Marian Harkin | Joe Higgins | Jim Higgins | Alan Kelly | Brian Mac Amhlaidh | Máiréad Nic Aonasa | Seán Ó Ceallaigh | Pádraig Ó Gallchóir