Hector Ó hEochagáin

Hector Ó hEochagáin
Beathaisnéis
Breith	17 Lúnasa 1969 ; 55 bliana d'aois; An Uaimh, Éire
Faisnéis phearsanta
Scoil a d'fhreastail sé/sí	Scoil Chlasaiceach Naomh Pádraig
Áit chónaithe	Gaillimh
Gníomhaíocht
Gairm	láithreoir teilifíse
Fostóir	TG4 ; Raidió Teilifís Éireann
Teangacha	An Ghaeilge

Láithreoir teilifíse Éireannach as an Uaimh i gContae na Mí is ea Hector Ó hEochagáin nó Hector. Bíonn cláir á gcur i láthair aige ar TG4 agus ar RTÉ. D'admhaigh sé le déanaí ar The Podge and Rodge Show go bhfuil 'Shane' mar chéadainm bunaidh aige. Tá éirithe leis suim nua a spreagadh i measc an phobail i leith na Gaeilge, leis an stíl láithreoireachta chraiceáilte bhríomhar réchúiseach atá aige i leith chúrsaí an tsaoil. Bíonn cláir á gcur i láthair aige anois as Gaeilge agus as Béarla.

Óige

Tógadh é san Uaimh, i gContae na Mí agus d'fhreastail sé ar St. Patrick's Classical School sa bhaile sin. Bhí sé ar scoil ann ag an am céanna leis na fuirseoirí clúiteacha ón Uaimh, Dylan Moran agus Tommy Tiernan. D'fhoghlaim sé an chuid is mó dá chuid Gaeilge i nGaeltacht Ráth Cairn le Coláiste na bhFiann sa chontae céanna agus in Inis Meáin. D'fhreastail sé ar Choláiste na Tríonóide ar feadh tamaill, ach níor thaitin saol na hollscoile leis agus d'éirigh sé as gan céim a fháil. Chuaigh sé go dtí an Spáinn lena chailín agus chaith sé trí bliana ansin, áit ar éirigh sé líofa sa Spáinnis.^[1]

Gairm Bheatha

Sular bhain sé cáil amach mar láithreoir ar TG4, d'oibrigh an tEochagánach mar chúntóir éifeachtaí teicniúla ar an gclár 'The Haunting of Hell House' agus ar an gclár 'Knocking on Death's Door'.

Seo a leanas a chuid oibre mar láithreoir teilifíse ó shin:

TG4 : Ba é Amú le Hector an chéad chlár aige ar TG4 sa bhliain 2000-2005. Bhí sraith ar leith den chlár seo suite i ngach ceann de na hilchríocha; An Eoraip, Meiriceá Thuaidh agus Meiriceá Theas, An Áise, An Afraic agus an Astráil.

RTÉ : Bhí na cláir Only Fools Buy Horses (2003) agus Hanging with Hector(2004) á gcur i láthair ag Hector ar RTÉ. Buaileann Hector le daoine cáiliúla sa chlár 'Hanging with Hector' agus leanann sé sa saol laethúil iad agus é ag labhairt leo as Béarla agus as Gaeilge. Bhuail sé le Bertie Ahern in eagrán amháin agus le fear eile na hUaimhe, Tommy Tiernan in eagrán eile. Ba léir gur chuir pearsantacht Uí Eochagáin as do Tiernan cuid áirithe ag an am agus é ag rá "Shut up" agus "Stop invading my aura" leis de shíor, le linn an agallaimh.

TV3 : Ghlac Hector páirt sa chlár faisnéise Chasing the Lions le Risteárd Cooper i 2005. Lean an bheirt acu camchuairt na 'The British and Irish Lions' sa Nua-Shéalainn.

Fógraíocht: Glacann sé páirt i bhfógraíocht do rásaíocht na gcapall agus d'uisce beatha agus i bhfógraíocht a bhaineann le cur chun cinn na Gaeilge.^[2]

Conspóid

Spreag Ó hEochagáin conspóid nuair a chuir sé as do dhaoine atá i gcoinne spórt fola, nuair a léirigh sé a mheas agus a shuim i dtrodaireacht tarbh ar an gclár Amú, agus é i Meicsiceo.^[3]

Saol Pearsanta

Tá cónaí air i gcathair na Gaillimhe faoi láthair lena bhean chéile agus a bheirt mhac.

Leabhair

Hector's World: on the Road with Ireland's Favourite Redhead, (Baile Átha Cliath 2006) ISBN 1-84488-110-5

Tagairtí

↑ http://beo.ie/index.php?page=archive_content&archive_id=767^{[nasc briste go buan]}
↑ "Seachtain na Gaeilge begions tomorrow" (as en) (2003-03-09).
↑ ""I love bullfighting": TV's Hector". www.banbloodsports.com. Dáta rochtana: 2020-11-02.

Naisc Sheachtracha

[1] ttp://beo.ie/index.php?page=archive_content&archive_id=767^{[nasc briste go buan]}

[2] "Seachtain na Gaeilge begions tomorrow" (as en) (2003-03-09).

[3] ""I love bullfighting": TV's Hector". www.banbloodsports.com. Dáta rochtana: 2020-11-02.

[1]

[2]

[3]