An Cléireach
 | |
| Cineál | saothar liteartha  |
|---|---|
| Cárta innéacs | |
| Údar | Darach Ó Scolaí |
| Teanga | an Ghaeilge |
| Foilseachán | 2007 |
| Seánra | úrscéal |
Úrscéal leis an scríbhneoir agus drámadóir Éireannach Darach Ó Scolaí is ea An Cléireach. Bhuaigh an t-úrscéal Duais an Oireachtais i 2007,[1] agus Gradam Uí Shúilleabháin i 2008.[2]. D'fhoilsigh Leabhar Breac an leabhar i 2007.
Saighdiúir agus cléireach atá in earráid lena choirnéal faoi ardú céime is ea fear inste an scéil. I dtuaisceart na Mumhan sa bhliain 1650, agus fuíleach arm an rí ag cúlú ó fhórsaí na parlaiminte, castar buíon filí agus scríobhaithe ar a chéile agus, beag beann ar an namhaid atá sna sála orthu, caitheann siad oíche ag seanchas cois tine. Sna scéalta a insíonn Cearbhall Óg Ó Dálaigh, Toirdhealbhach Carrach Ó Conchubhair agus an Fear Flatha Ó Gnímh, tagann plota eile chun cinn san úrscéal, fear óg a leagtar mar chúram air leabhar beannaithe, atá i seilbh a mhuintire le trí chéad bliain, a thabhairt slán ó ionradh Shasana ar an tír i 1601. Tugann an cúram oidhreachtúil seo as Éirinn go dtí an Ísiltír Spáinneach é, as sin go dtí an Bhóihéim, áit a nglacann sé páirt i gCath an tSléibhe Bháin mar mhuscaedóir i gcomplacht an chaptaein Somhairle Mac Domhnaill, agus as sin go Coláiste Naomh Antaine sa Lobháin i gcuideachta an Bhráthair Micheál Ó Cléirigh, an Bhráthair Eoghan Rua Mac an Bhaird, agus an athar Brian Mac Giolla Coinnigh, agus ar ais go hÉirinn i lár Chogadh na Comhdhála agus Chogadh Chromail. Cé go dtagann an t-aighneas idir an cléireach agus an coirnéal chun cinn roimh dheireadh na hoíche seanchais sin in Éirinn, is sa bhliain 1667 a thugtar snátha an scéil le chéile agus fear inste an scéil ar deoraíocht in Ostend na hÍsiltíre.
Leagann Tadhg Dubh Ó Cróinín sa Limerick Leader béim ar inchreidteacht agus dealraitheacht na scríbhneoireachta a mheallann an léitheoir isteach sa scéal agus a chuireann ina luí air go bhfuil sé i gcorplár na cuilithe pé áit a ngluaiseann an t-aicsean.[3] Is ar an úrscéal mar fhicsean comhaimseartha a chuireann Philip Cummings béim in Lá Nua agus ar chleasaíocht an údair, agus in insint féin-chomhfhiosach an scéalaí san úrscéal ach go háirithe.[4]
Naisc Sheachtracha
[cuir in eagar | athraigh foinse]Tagairtí
[cuir in eagar | athraigh foinse]- ↑ "Oireachtas na Gaeilge - Nuacht - €55,000 de Luach Saothair do Scríbhneoirí". Cartlannaíodh an bunleathanach ar 2007-11-19. Dáta rochtana: 2007-12-21.
- ↑ "Gaelport- 'An Phleist Mhór 'agus 'An Cléireach' fógartha mar buaiteorí 'Leabhar na Bliana'2008". Cartlannaíodh an bunleathanach ar 2013-05-25. Dáta rochtana: 2013-05-30.
- ↑ "The Limerick Leader, Ag Baint Sponcain". Cartlannaíodh an bunleathanach ar 2008-01-07. Dáta rochtana: 2007-12-21.
- ↑ Lá Nua, Faoi Chaibidil[nasc briste go buan]