Riail an ochtréid

Ón Vicipéid, an chiclipéid shaor.

Is í riail an ochtréid an riail sa cheimic a deir go bhfuil sé de chlaontacht ag na dúile ina gcuid comhdhúl ochtréad iomlán a bhaint amach ar an sceall leictreon is faide amuigh. Is é sin, má tá seacht leictreon ar an sceall sin, beidh an dúil ag iarraidh an t-ochtú leictreon a fháil ar iasacht ó adamh na dúile eile, agus má tá ochtréad iomlán ar an dara sceall is faide amuigh agus aon leictreon amháin ar an sceall is faide amuigh, tabharfaidh an dúil an leictreon sin ar iasacht don dúil eile. Maidir leis na triathgháis, tá ochtréad acu cheana féin, agus sin é an tuige nach mbíonn siad araiciseach chun imoibriú le dúile eile ach ar éigean.

Tá a lán dúl ann - na miotail trasdultacha ach go háirithe - nach féidir leo an t-ochtréad iomlán a bhaint amach ar aon nós. Mar sin, bíonn siad ag lorg struchtúir "leathchobhsaí" ina gcuid comhdhúl - go tipiciúil, sceall an ocht leictreon déag, nó an struchtúr "18 + 2" - is é sin, dhá leictreon ar an sceall is faide amuigh, agus ocht gceann déag ar an dara sceall is faide amuigh.

Go bunúsach, is iad na neamh-mhiotail, na miotail alcaileacha agus na miotail chré-alcaileacha is dlúithe a chloíonn le riail an ochtréid. Maidir leis an hidrigin, níl ach aon sceall amháin aici, an sceall is cóngaraí don núicléas, agus níl áit ansin ach do dhá leictreon: mar sin, tá an hidrigin ag iarraidh struchtúr an héiliam a bhaint amach, is é sin, dhá leictreon ar an t-aon sceall amháin sin.