Ailse ghoile

Ailse a thosaíonn i líneáil bhalla an ghoile. Cuireann sí isteach ar dhaoine meánaosta, agus tá claonadh ann gan í a aithint go dtí staid dhéanach, tar éis di ionradh a dhéanamh trí bhalla an ghoile is insíothlú isteach in orgáin chóngaracha eile. Scaipeann sí freisin in imshruthú na fola don ae. Is iad na siomtóim ansin ná cailliúint meáchain, pian sa bholg, agus masmas. Is féidir go gcuirfidh an lot bac ar ghabháil an bhia tríd an ngoile agus go dtarlóidh urlacan dá bharr, nó go mbeidh duine ag cur fola go mall thar thréimhse fhada agus go dtarlóidh anaemacht mar thoradh air sin. Sa chóireáil máinliachta, baintear cuid den ghoile amach, ach ní bhíonn an phrognóis go maith de ghnáth.