Patricia McKenna

Patricia McKenna
Feisire de Pharlaimint na hEorpa Iúil 19, 1994 - Iúil 19, 1999 Dúiche: Baile Átha Cliath (toghcheantar na hEorpa) Toghchán: toghchán Pharlaimint na hEorpa 1994 Feisire de Pharlaimint na hEorpa Iúil 20, 1999 - Iúil 20, 2004 Dúiche: Baile Átha Cliath (toghcheantar na hEorpa) Toghchán: toghchán Pharlaimint na hEorpa 1999
Saol
Eolas breithe	Caisleán an tSiáin, 13 Márta 1957 (66 bliain d’aois)
Náisiúntacht	Éire
Teanga dhúchais	an Béarla
Oideachas
Alma mater	Coláiste na Tríonóide, Baile Átha Cliath
Teangacha	an Béarla
Gairm
Gairm	polaiteoir
Áit oibre	Strasbourg agus An Bhruiséil
Cleamhnú
Páirtithe polaitíochta	Comhaontas Glas

Bhí Patricia McKenna (ar 13 Márta 1957 a rugadh í ) ar dhuine den bheirt Fheisirí Eorpacha a bhí ag an gComhaontas Glas sa tréimhse 1994-2004. Bhí sí ina hionadaí ar son Bhaile Átha Cliath, ach theip uirthi a suíochán a choinneáil sa bhliain 2004. Sheas sí don Dáil in Olltoghchán 2007 i ndáilcheantar Bhaile Átha Cliath Láir, ach níor éirigh léi a bheith tofa. Chuaigh sí san iomaíocht in éineacht le John Gormley le haghaidh cheannaireacht an Chomhaontais Ghlais in Iúil 2007, tar éis do Trevor Sargent éirí as an bpost sin. Bhí an bua ag John Gormley sa deireadh ach d'éirigh níos fearr le McKenna ná mar a bhíothas ag súil leis, nuair a d'éirigh léi breis is aon trian de vótaí na mball a fháil.

Gairm

Is iarmhúinteoir as Caisleán an tSiáin i gContae Mhuineacháin í McKenna. Bhí an chéad bhaint aici leis an gComhaontas Glas ag deireadh na bliana 1986, nuair a chuaigh na Glasaigh Grattan Healy agus Petra Kelly, go mór i bhfeidhm uirthi go polaitiúil. An chéad pháirt mhór a bhí aici sa pháirtí ná nuair a chabhraigh sí le ceolchoirm le 'The Waterboys' a eagrú. Dheonaigh an banna ceoil seo a gcuid ama chun airgead a bhailiú le haghaidh an pháirtí i 1987. Chonacthas í ar an teilifís don chéad uair sa bhliain 1988, nuair a bhí sí féin agus John Gormley ar 'The Late Late Show' le Gay Byrne, thar ceann an Chomhaontais Ghlais.

Baineadh geit mhór as an saol polaitiúil i 1994 nuair a d'éirigh le beirt d'iarrthóirí an Chomhaontais Ghlais sna toghcháin Eorpacha, is é sin, Patricia McKenna agus Nuala Ahern. Bhain McKenna barr na vótála amach i mBaile Átha Cliath, le 14.53% den vóta agus gan ach buiséad toghcháin de thart ar £6,000 aici. Toghadh arís í i 1999 le vóta níos ísle. Bhí McKenna go mór i mbéal an phobail le linn an reifrinn colscartha sa bhliain 1995, de bharr 'Bhreithiúnas McKenna', nuair a d'éirigh léi bac bunreachtúil a chur ar chaitheamh airgead an státchiste náisiúnta, ar thaobh amháin den argóint i gcás reifrinn.

Tá McKenna go mór ar son neodracht mhíleata na hÉireann agus is duine í atá amhrasach faoi fhorbairt neamhdhaonlathach an Aontais Eorpaigh mar aonad polaitiúil.

Sheas McKenna i gcoinne mhargaidh rialtais an Chomhaontais Ghlais le Fianna Fáil i Meitheamh 2007. Tá sí ina cónaí faoi láthair i nGlas Naíon i mBaile Átha Cliath, lena fear céile agus a dtriúr páistí.

Naisc sheachtracha

• Próifíl McKenna ar shuíomh gréasáin an Chomhaontais Ghlais Curtha i gcartlann 2007-11-18 ar an Wayback Machine
• Físeán toghcháin McKenna do thoghchán ceannaireachta an Chomhaontais Ghlais
• Cóip den teachtaireacht ríomhphoist ó McKenna agus í ag lorg ainmniúchán le haghaidh cheannaireacht an Chomhaontais Ghlais Curtha i gcartlann 2007-09-29 ar an Wayback Machine
• Próifíl McKenna ar mycandidate.ie
• Cóip d'óráid a tugadh i leith paitinní bogearraí, a bhfuil ráiteas inti ó McKenna