Harri Holkeri

Ón Vicipéid, an chiclipéid shaor.
Harri Holkeri
Holkeri.jpg
Holkeri mar Chathaoirleach ar Chomhtionól Ginearálta na Náisiún Aontaithe

In oifig
30 Aibreán 1987 - 26 Aibreán 1991
Réamhtheachtaí: Kalevi Sorsa
Comharba: Esko Aho

Dáta breithe 6 Eanáir 1937
  Oripää, An Fhionlainn
Dáta báis 7 Lúnasa 2011
  Heilsincí, An Fhionlainn
Páirtí Kansallinen Kokoomus
Céile Marja-Liisa Lepistö

Polaiteoir coimeádach Fionlannach agus eadránaí síochána a bhí i Harri Hermanni Holkeri a rugadh in Oripää ar an 6 Eanáir 1937 agus a fuair bás ar an 7 Lúnasa 2011 i Heilsincí. Bhí sé ina Phríomh-Aire sna blianta 1987-1991 agus ina chathaoirleach ar Chomhthionól Ginearálta na Náisiún Aontaithe ("Comhthionól na Mílaoise") ón 5 Meán Fómhair 2000 go dtí an 11 Meán Fómhair 2001. Chaith sé blianta deireanacha a ghairmréime ag obair ina eadránaí síochána do na Náisiúin Aontaithe.

Óige[athraigh | edit source]

Bhí a athair, Antti Edward Holkeri, ina phóilín in Oripää in iardheisceart na Fionlainne, agus Maire Kyllikki née Ahlgren a bhí ar a mháthair. D'aistrigh an teaghlach go Toijala (cuid d'Akaa inniu, in aice le Hämeenlinna), áit ar chaith Holkeri blianta a chéad óige. Sa bhliain 1957 bhain sé amach a Ardteastas ón meánscoil áitiúil (Toijalan yhteiskoulu). Bhí sé ina ghasóg freisin. I ndiaidh an Ardteastais chuaigh sé sna saighdiúirí le bliain an choinscríofa a chaitheamh ansin, agus nuair a bhi an téarma curtha de aige, chuaigh sé ag staidéar eolaíocht pholaitiúil in Ollscoil Heilsincí. Bronnadh céim ollscoile air sa bhliain 1962.

Phós Holkeri Marja-Liisa Lepistö sa bhliain 1960, agus saolaíodh mac agus iníon dóibh, Jukka agus Katju, sna blianta 1962 agus 1964.