Henry Salt

Henry Salt (14 Meitheamh 1780 – 30 Deireadh Fómhair 1827): ealaíontóir, taidhleoir agus Éigipteolaí.

Sa bhliain 1815 ceapadh Salt mar phríomhchonsal Briotanach i gCaireo. Ba ghearr go raibh sé féin agus Bernardino Drovetti, an consal Francach, ag dul in adharca a chéile, agus iad araon ag iarraidh seandachtaí Éigipteacha a fháil ar ais nó ar éigean. Bhí gach duine acu ag brath ar dhiograiseoirí eile: bhí an sceitseálaí Frédéric Cailliaud agus an dealbhóir Jacques Rifaud ag cuidiú le Drovetti agus d’fhostaigh Salt Giovanni Battista Belzoni.

Chuir Salt tochailt á déanamh sa Téibh agus in Abú Simbel; é oilte ar léamh na n-iarglaifí agus bua na healaíne aige, rud a chuaigh ar sochar dó agus é ag léiriú a bhfaca sé ag taisteal dó.

Bhailigh sé a lán seandachtaí agus é san Éigipt, go háirithe ceann Raimséas II (a taispeánadh in Iarsmalann na Breataine) agus sarcófagas Raimséas III (ar cheannaigh an Louvre é).

Cailleadh Salt i gCathair Alastair san Éigipt.

Tagairtí

• Manley, Deborah agus Reé, Peta, Henry Salt: Artist, Traveller, Diplomat, Egyptologist. ISBN 190196503x