Georgetown

Ón Vicipéid, an chiclipéid shaor.
Suíomh

Is é Georgetown (daonra measta 213,705 sa bhliain 2002) príomhchathair na Guáine, agus an chathair is mó sa tír. Tá sí suite ar an Aigéan Atlantach ar béal abhann Demerara agus feidhmíonn sí mar ionad riaracháin agus tráchtála. Bhunaigh an Leifteanant Cornal Robert Kingston baile ar bhéal an Demerara nuair a ghabh an Bhreatain seilbh ar an gcóilíneacht sa bhliain 1781. Ach ba iad na Francaigh a d'fhorbair an baile nuair a thóg siad an chóilíneacht ón mBreatain bliain ina dhiaidh sin. La Nouvelle Ville a thug na Francaigh ar an mbaile agus cuireadh bonn maith daingean faoi fhoirgnimh an bhaile ionas nach ndéanfadh tuilte dochar dóibh.

Cúpla bliain ina dhiaidh sin (1784) tugadh an chóilíneacht ar ais do na hOllanaigh agus thug siad sin Stabroek mar ainm air, ach athainmníodh arís eile é nuair a tugadh Georgestown air in ómós don Rí Seoirse III na Breataine. Bronnadh stádas oifigiúil cathrach ar Georgetown sa bhliain 1842 nuair a bhí an Bhanríon Victoria i réim. Léiríonn ainmneacha na sráideanna tionchar na dtíortha éagsúla a bhí i gceannas ar an gcóilíneacht ó cuireadh ar bun í.

Tá teach an rialtais agus príomhionaid riaracháin agus gnó na tíre i Georgetown.