Jacob Grimm

Rugadh Jacob Ludwig Grimm (4 Eanáir, 1785 - 20 Meán Fómhair 1863) in Hanau sa Hessen. Le cúnamh a dhearthár, Wilhelm Caireall, chnuasaigh sé agus d’fhoilsigh finscéalta meallacacha a thíre dúchais. Ar Eolas i dtosach báire mar "Deutsche Sagan", bhí siad chomh taitneamhach san i mbéal an phobail go ndearnadh nathán buan chlúiteach dá shloinne.

Tá eolas leathan ar shloinne Ghrimm agus tugtar ard-urraim dó ar fud an domhain inniu mar údar na bhfinscéal draíochtúil úd Plúirín sneachta, Hansel is Gretel, agus mar sin de. Go cinnte thug siad seo aoibhneas sceitimíneach agus drithlíní gliondar gan teora i saol “ligimis orainn” na bpaistí leis na cianta. Ní hionadh go bhfuil díon chroí na hóige i ngach aird bainte amach aige, agus bá acu leis dá réir.

Mar sin féin, níl iontu-siúd ach cuid bheag dá dheonú dearscnaithe ar litríocht an domhain. Airítear a Deutsche Grammatik, a leabhar gramadaí Gearmáinise a foilsíodh i gceithre imleabhair, ar a phríomh-shaothar. B’ é an chead taighde stairiúil a rinneadh fé teangacha Gearmánacha, agus glactar leis fós mar an scoth dá chineál.

Ar ball, tar éis tuilleadh blianta diana staidéir, chum sé saothar scolártha eile fé Bunús Teanga. Thug sé fíor-shuntas dó mar duine de na scoláirí teangeolaíocha dearscnaithe lena linn. Chuir an saothar mion chúiseach seo fé ealaín teanga tús le nua-raonta staidéir sa bhfocleolaíocht. Níl ach a laghad de shamhail Ghrimm sa raon staidéir seo, admhaítear.

Ar deireadh thiar, chaith sé a dhúthracht ar fhoclóir Gearmáinise cuimsitheach a chur le cheile – an Deutsche Worterbuch, mar a thug sé air. Bíodh gur shaothraigh sé gan stad gan staonadh go ceann aon bhliain déag ní raibh sé críochnaithe aige nuair tháinig an bás air i 1863. Bhí sé 78 mbliana d’aois an tam úd. Chríochnaigh scoláirí Gearmáineacha é i rith 1961, ámh.

Gan dabht ar bith, chuir Jacob Grimm go mór le litríocht an domhain, mar bhéaloideasaí, scéalaí, agus sár-fhocleolaí. Beidh buan-cuimhne an phobail air i gcónaí le fíor-mheas agus buíochas – agus le gáirí pléisiúir na hóige, chomh maith.