Vladimir Nabokov
Úrscéalaí Rúiseach-Mheiriceánach ab ea Vladimir Vladimirovich Nabokov, a rugadh ar an 22 Aibreán 1899 i gCathair Pheadair, an Rúis, agus a cailledh i Montreux, an Eilvéis, ar an 2 Iúil 1977).
Vladimir Sirin an t-ainm cleite a d'úsáideadh sé uaireanta. Is é Lolita, an t-úrscéal conspóideach a scríobh sé as Béarla faoi scéal péidifileach grá, an saothar is mó a tharraing súil na ndaoine air, ach le fírinne chum sé a lán leabhar ceannródaíoch eile, ar nós Pale Fire. Níor shocraigh sé síos i Meiriceá ach sa bhliain 1940.
Lolita[cuir in eagar | athraigh foinse]
Úrscéal Béarla de chuid Vladimir Nabokov ab ea Lolita. Humbert Humbert is ea príomhcharachtar an úrscéil agus is iad na rudaí a dhéanann seisean le Lolita le linn an scéil a rinne téacs conspóideach de. Cuireadh an saothar faoi chois ar bhonn graostachta ar dtús, graostacht á cur i láthair mar ealaín atá ann a deirtear.
Teanga[cuir in eagar | athraigh foinse]
Bhí Nabokov ina scríbhneoir tábhachtach ina theanga dhúchais féin sular aistrigh sé go dtí na Stáit Aontaithe, ach nuair a d'aistrigh, chuaigh sé leis an mBéarla ar fad mar theanga scríbhneoireachta. Is mar scríbhneoir Béarla a bhain sé amach clú domhanda.
Bhí Béarla agus Fraincis aige óna chéad óige, nó cosúil lena lán uaisle Rúiseacha san am tógadh go hilteangach é. San am chéanna is léir gur Béarla seanfhaiseanta ardliteartha a bhí aige riamh, agus is léir do léitheoirí a chuid saothar nár tógadh in aon tír Bhéarla é.
.jpg)
Feithideolaíocht[cuir in eagar | athraigh foinse]
Bhí Nabokov ina fheithideolaí, agus d'aithin agus d'ainmnigh sé cúpla speiceas nua d'fheileacáin. Bhí sé ina thacsanomaí (is é sin, ina aicmitheoir speiceas nua), ach ní raibh tuiscint ródhomhain aige ar an mbitheolaíocht - a mhalairt ar fad níor chreid sé sna géinte ná i dteoiricí nua-aoiseacha na hoidhreachtúlachta.