The Miami Showband
| Sonraí | |
|---|---|
| Cineál | banna ceoil  |
| Gníomhaíocht | |
| Tréimhse oibre | 1962 – |
| Seánra | Popcheol |
 
| |
Ba iad réalta a linne iad, seó-bhanna an Miami.[1] Bhí meas orthu sna 1960idí agus sna 1970idí mar cheoltóirí agus na céadta ag triall ar na hallaí inar sheinn siad ó cheann ceann na tíre. Is iomaí cailín óg a raibh pictiúir an ghrúpa ar bhalla a seomra aici. Bhí tóir go speisialta ar Fran O’Toole, príomhamhránaí an bhanna.
Ba gheall le crith talún é in 1975 nuair a chuala an pobal an scéal gur maraíodh triúr de sheóbhanna an Miami.
1960idí-1975
[cuir in eagar | athraigh foinse]Bhí Dickie Rock ina bhall den Miami Showband, sna 1960idí (mar shampla sa Chomórtas Amhránaíochta na hEoraifíse, 1966).[2]
Ba mhinic bannaí ón deisceart ag seinm i hallaí sa Tuaisceart agus bhíodh daoine óga ó gach aicme agus dhá thaobh na deighilte ag freastal ar rincí d’ainneoin na Trioblóidí a bheith fíochmhar. Banna trasteorann agus trasphobail ab ea an Miami ó bhí tuaisceartaigh agus deisceartaigh, Caitlicigh agus Protastúnaigh ann agus dlúthchairdeas eatarthu go léir. Ina theannta sin sheinn siad i hallaí i gceantair dhílseacha agus náisiúnacha.[3]
1975-1982
[cuir in eagar | athraigh foinse]Ar an 31 Iúil 1975 maraíodh triúr den bhanna, bhí beirt eile gortaithe go dona agus bhí a veain ina smionagar tar éis ionsaí lámhaigh agus pléasc. Ar an 31 Iúil 1975 bhí cúigear ball den Miami ar a mbealach abhaile go Baile Átha Cliath tar éis a bheith ag seinm i halla an Chaisleáin i nDroichead na Banna. Stopadh iad ag seicphointe; bhí baill den den UVF agus den UDR, reisimint áitiúil cúltaca d’Arm na Breataine sa drong a stop an Miami. Maraíodh Fran O’Toole, 29, amhránaí, Tony Geraghty, 23, giotáraí agus Brian McCoy, 33, trumpadóir. Gortaíodh Stephen Travers agus Brian McAlea.[3]
Chuaigh an Miami ar an stáitse arís in 1976, agus bhris an banna suas sa bhliain 1982.
Comóradh
[cuir in eagar | athraigh foinse]In 2021 tar éis cás cúirte a mhair naoi mbliana in aghaidh Roinn Cosanta na Breataine agus na bpóilíní fuair gaolta na marbh agus na marthanóirí cúiteamh £1.5 milliún eatarthu. Admháil ar chlaonpháirteachas ab ea é, cé nár dhúirt an stát gur admháil ab ea é.
I mí Aibreáin 2025, léiríodh ómós i Maigh gCaiseal i nDún Geanainn do Wesley Somerville, an ball eile den UVF a maraíodh sa phléasc.
Ar an 30 Iúil 2025, ghlac iarbhaill an bhanna - Stephen Travers agus Brian McAlea - agus lucht tacaíochta páirt i searmanas cuimhneacháin ag láthair an tsléachta.
Ar an 1 Lúnasa 2025 bhí paráid i bPort an Dúnáin in ómós do Harris Boyle, duine dá n-ionsaitheoirí. Comhalta den UDR ab ea Boyle a maraíodh nuair a phléasc an buama a bhí sé a leagan i veain an bhanna.[3]
Féach freisin
[cuir in eagar | athraigh foinse]Tagairtí
[cuir in eagar | athraigh foinse]- ↑ i mBéarla, The Miami Showband
- ↑ ESC Stuff (2024-06-04). "1966 Ireland: Dickie Rock - Come Back to Stay (4th place at Eurovision Song Contest in Luxembourg)".
- ↑ 3.0 3.1 3.2 Póilín Ní Chiaráin (3 Lúnasa 2025). "Sléacht an Miami – bíodh cearta d’íobartaigh mar chuimhne air" (ga-IE). Tuairisc.ie. Dáta rochtana: 2025-08-03.