Teangacha na mBeirbeireach
 | |
| Cineál | fine teangacha |
|---|---|
| Úsáid | |
| Cainteoirí dúchais | 17,000,000 |
 | |
| Aicmiú teangeolaíoch | |
| teanga dhaonna Teangacha Afráiseacha | |
| Cóid | |
| ISO 639-2 | ber |
| ISO 639-5 | ber |
| Glottolog | berb1260 |
| Linguasphere | 10 |
| IETF | ber |
Is iad teangacha na mBeirbeireach (nó na teangacha Beirbeireacha) teangacha bundúchasacha an tSahára, agus iad á labhairt ag dhá scór milliún duine sna tíortha timpeall an tSahára. Labhraítear iad ag daonraí móra san Ailgéir agus i Maracó, agus ag daonraí níos lú sa Libia, sa Túinéis, i dtuaisceart Mhailí, iarthar agus tuaisceart na na Nígire, tuaisceart Bhuircíne Fasó, san Mháratáin, agus in ósais Sioua san Éigipt. Tá pobail imirceacha a labhraíonn teangacha na mBeirbeireach ina gcónaí in Iarthar na hEorpa ó na 1950í. Sa bhliain 2001, bhain teangacha na mBeirbeireach stádas amach mar theanga náisiúnta bhunreachtúil na hAilgéire, agus sa bhliain 2011 bhain an teanga stádas oifigiúil bunreachtúil amach i Maracó, tar éis blianta de ghéarleanúint.
Teangacha Afráiseacha iad, is é sin tá gaol acu leis na teangacha Seimíteacha agus na teangacha Cúiseacha, ach san am chéanna tá siad an-difriúil leis na teangacha Afráiseacha eile. Maidir leis na teangacha Beirbeireacha féin tá dlúthghaol acu le chéile, agus is iomaí teangeolaí a deir nach bhfuil ach canúintí aon teanga amháin iontu. Is iad na príomhtheangacha Beirbeireacha ná Tacelhit, Taqbaylit, Tamazight, Tmazight, Tacawit agus Tamahaq. Na Beirbeirigh a bhfuil oideachas orthu, tá siad ag forbairt comhtheanga scríofa do na canúintí go léir, agus is éard a thugann siad ar an teanga chaighdeánach seo ná Tamazight.
Is í an ghné is feiceálaí de ghramadach na dteangacha Beirbeireacha ná an dá t a chuirtear timpeall an ainmfhocail más focal baininscneach é. Samplaí de seo iad ainmneacha na dteangacha, mar a fheicimid ar ainmneacha na dteangacha Beirbeireacha féin. Tirlandit an t-ainm Beirbeireach ar an nGaeilge.