Cruinne

Sainmhínítear an Chruinne go coitianta mar an iomláine de gach rud atá ann, lena n-áirítear gach damhna agus fuinneamh, na pláinéid, na réaltaí, na réaltra, agus ábhar an spáis idir-réaltrach. Tugtar an cosmos nó an mhórchruinne freisin uirthi. Tugann breathnóireacht eolaíochta ar luath-chéimeanna i bhforbairt na Cruinne le fios go raibh an Chruinne faoi rialú ag na dlíthe fisiciúla agus tairisigh céanna an chuid is mó dá saol agus dá stair. Creidtear go bhfuil trastomhas de 93 billiún solasbhliain ag an gcruinne ar a bheag. Tugann teoiric na hOllphléisce míniú ar bhunús agus ar fhorbairt na cruinne. Chruthaigh an Ollphléasc an chruinne 13.7 billiún bliain ó shin, dar le teoiric na hollphléisce. Tá teoiricí éagsúla ag teacht chun tosaigh, ina mholann fisiceoirí nach bhfuil ár gCruinne uathúil ach go bhfuil sí ina ceann amháin i measc go leor eile.