Gealacha Iúpatair

Glactar leis go bhfuil, ar a laghad, trí cinn agus trí scór de ghealacha ag Iúpatar. Ba é Galileo Galilei a tháinig ar an gceithre cinn is mó acu, mar atá, Io, Europa, Ganymede, agus Callisto, nó Gealacha Galileo. Ó shin i leith, áfach, fuair na réalteolaithe amach faoina lán eile. Is gnách iad a aicmiú ina ngrúpaí mar seo:

• grúpa Amalthea, is é sin, na cinn a bhíonn ag timpeallú Iúpatair taobh istigh d'fhithisí Ghealacha Galileo. Is iad Amalthea, Adrastea, Thebe agus Metis na gealacha sa ghrúpa seo.

• gealacha Galileo, is é sin, na gealacha móra téagartha, Io, Europa, Ganymede, agus Callisto.

• na satailítí mírialta, is é sin, na satailítí beaga a thimpeallaíonn Iúpatar ar fhithisí fadaithe taobh amuigh de ghealacha Galileo. Is iad seo an grúpa is mó acu.