Mairéad Ní Fhlatharta

Mairéad Ní Fhlatharta

Beathaisnéis
Breith	Baile an tSléibhe
Teanga dhúchais	an Ghaeilge
Gníomhaíocht
Gairm	amhránaí
Teangacha	An Ghaeilge, Béarla agus Gaeilge na hAlban

Amhránaí sean-nóis í Mairéad Ní Fhlatharta arb as Baile an tSléibhe sa Spidéal di. Ceapadh í mar Amhránaí Cónaitheach ag Ollscoil na Gaillimhe sa bhliain 2024.

Tá Mairéad ag gabháil don amhránaíocht ó thosaigh sí ag freastal ar ranganna sean-nóis sa Ghaelacadamh agus í seacht mbliana d’aois. I measc na múinteoirí a roinn a gcuid eolais léi go flaithiúil, bhí Pat Phádraic Tom Ó Conghaile agus Peatsaí Ó Ceannabháin nach maireann. Chomh maith leis an oiliúint a fuair sí uathusan, tá anáil Sheosaimh Uí Éanaí agus Dharach Uí Chatháin le clos i nguth Mhairéide agus í ag amhrán. Ina dteannta san, luann sí féin an rian a d’fhág Dara Bán agus Caitlín Maude uirthi as a hóige.

Ag cur síos dó ar chumas amhránaíochta Mhairéide, luann Éamon Ó Donnchadha binneas a glóir agus an tslí gur féidir léi ceol ársa na filíochta a thabhairt léi is í ag canadh. Leis sin, a deir sé, ‘Tá an aois agus an ársacht a bhaineann le seanamhráin, tá an chroíúlacht agus an óige a bhaineann leis na hamhráin nua le brath ar rogha amhrán Mhairéad.”

Deir Mairéad féin go mbíonn sí ‘faoi dhraíocht ag na hamhráin sean-nóis, idir fhoinn agus fhocail’ agus í ag canadh. ‘Is fada liom’, ar sise, ‘go mbeidh deis agam saibhreas filíochta na nGael, chomh maith leis an ghrá agus na téamaí éagsúla eile as amhráin na ndaoine a roinnt go fial le linn mo sheal mar amhránaí cónaitheach ag Ollscoil na Gaillimhe’.

Agus an ceapachán mar Amhránaí Cónaitheach á fhógairt aici, dúirt an Dr Méabh Ní Fhuartháin go raibh foireann Ionad Léann na hÉireann thar a bheith sásta go mbeadh Mairéad Ní Fhlatharta ag obair ina dteannta. ‘Is gné fíorthábhachtach den obair atá ar siúl againn anso’, a dúirt sí, ‘an nasc beo atá againn leis an traidisiún amhránaíochta agus gnéithe eile den gcultúr dúchais béil i nGaeltacht Chonamara. Bhí sé de phribhléid againn cuid de na hamhránaithe ba chumasaí ar fad a bheith ag obair láimh ar láimh linn ó bunaíodh an scéim seo 20 bliain ó shin agus níl aon amhras orm ná go gcuirfidh Mairéad Ní Fhlathartha leis an oidhreacht shaibhir sin.’

Beidh sraith ceardlann á múineadh ag Máiréad san Ollscoil mar chuid den Chónaitheacht.

Is iad Ealaín na Gaeltachta, Údarás na Gaeltachta, An Chomhairle Ealaíon agus Ionad Léann na hÉireannaigh, Ollscoil na Gaillimhe, a mhaoinigh an tionscnamh seo.