Lisa Murray
Ceoltóir agus scríbhneoir amhrán Gaeilge í Lisa Murray, arb as Gaeltacht Bhaile Ghib, Contae na Mí, ó dhúchas di. Tá aithne fhorleathan uirthi mar "Ghaeilgeoir Swift" nó "Taylor Swift na Gaeilge," leasainm a tugadh uirthi tar éis di aird a tharraingt ar líne lena leaganacha Gaeilge d'amhráin le Taylor Swift. Is é Abhaile teideal a céad albaim, atá le heisiúint i mí Mheán Fómhair 2026.[1][2][3][4][5]
Óige agus oideachas
[cuir in eagar | athraigh foinse]Tógadh Lisa Murray i mBaile Ghib, agus thosaigh sí ag seinm an phianó agus í seacht nó ocht mbliana d'aois. Thosaigh sí ag cumadh amhrán go luath ina dhiaidh sin, timpeall deich mbliana d'aois. Mar dhéagóir, ghlac sí páirt in amharclannaíocht agus i mbannaí ceoil éagsúla. Rinne sí staidéar ar an gceol agus ar an Nua-Ghaeilge i gColáiste na Tríonóide, Baile Átha Cliath, agus ina dhiaidh sin bhain sí máistreacht amach i mBerklee College of Music i mBostún (bronnadh an scoláireacht "Outstanding Woman" uirthi).
Ina dhiaidh sin, chuaigh sí chun cónaithe i Londain ar feadh trí bliana, áit ar oibrigh sí do Sony Music. In ainneoin di a bheith ag obair i dtionscal an cheoil, níor cheangail sí a saothar ceoil lena teanga dhúchais go dtí deireadh na bliana 2024. Nuair a bhí sí thar lear, mhothaigh sí uaigneach, agus thuig sí luach na Gaeilge di féin ar bhealach nár thuig sí roimhe sin. Bhog sí abhaile go hÉirinn dá bharr.[1][3][4]
Gairm
[cuir in eagar | athraigh foinse]Le linn na paindéime Covid, thosaigh sí ag léiriú a cuid ceoil féin óna seomra leapa. D'eisigh sí a céad shingil, "I Unfollowed U," i 2022; fuair sé an-aird ar an raidió náisiúnta, agus tháinig sé isteach i measc na n-amhrán ba mhó ar chairt Shazam na hÉireann.
Ba í "Uaigneach," a d'eisigh sí ag deireadh na bliana 2024, an chéad amhrán léi go hiomlán as Gaeilge, agus é ina thús lena haistear mar cheoltóir Gaeilge. D'éirigh go maith léi ar líne ina dhiaidh sin: nuair a phostáil sí físeán ar TikTok ag cur a cuid ceoil chun cinn, thug duine éigin "Gaeilgeoir Swift" uirthi sna tuairimí, agus ghlac sí leis an leasainm sin ó shin.
Rinne sí leaganacha Gaeilge d'amhráin le Taylor Swift ina dhiaidh sin, ina measc "You Belong With Me" (ón albam Fearless), "August," "The Fate of Ophelia," agus "Opalite." Nuair nach raibh focal Gaeilge ann do théarma áirithe—mar shampla "bleachers"—roghnaigh sí an focal "seastán" ina áit.
D'eisigh sí leagan clúdaigh den amhrán "Ríocht na Sí" in éineacht leis an gceoltóir CAOIMHÍN, tar éis dóibh beirt a gcuid ceoil a mhalartú ar an gclár teilifíse Casadh sa Cheol ar TG4.[5] Ghlac sí páirt freisin sa scéim forbartha Glór Ár Linne de chuid Raidió Rí-Rá, agus sheinn sí ar an stáitse Gaeilge ag Picnic Leictreach i mí Lúnasa 2025. Craoladh Electric Picnic 2025 ar chlár TG4, Beó ón Electric Picnic, in éineacht le ceoltóirí eile ar nós Kneecap, Amble, agus IMLÉ.
Sheinn sí beo ar RTÉ Raidió 1, tugadh aitheantas "One to Watch" di ó TodayFM, agus bhí sí le feiceáil ar an gclár teilifíse Ireland AM.
"Céim ar Chéim" agus an chéad albam
[cuir in eagar | athraigh foinse]D'eisigh Lisa Murray a singil nua, "Céim ar Chéim," ar an 24 Iúil 2026—an chéad singil oifigiúil óna céad albam, Abhaile, atá le teacht i mí Mheán Fómhair 2026. Scríobh agus léirigh sí féin agus a comhléiritheoir, Cian Sweeney, an t‑amhrán. Déanann Abhaile iniúchadh ar théamaí na himirce agus na féiniúlachta. Fuair sí maoiniú ó Chultúr Éireann chun aistear a dhéanamh leis an albam i mí Dheireadh Fómhair 2026..[1][3][4]
Aitheantas
[cuir in eagar | athraigh foinse]Tá Lisa Murray tar éis labhairt go poiblí faoi bhród Gaeltachta agus faoi thábhacht an phopchultúir chomhaimseartha sa Ghaeltacht. Agus í ag cur a singile is déanaí chun cinn, dúirt sí gurb é a príomhsprioc mar ealaíontóir ná a léiriú gur féidir popcheol comhaimseartha a chruthú trí Ghaeilge, agus spreag sí daoine óga sa Ghaeltacht le bheith bródúil as a mbunadh.
Is féidir Lisa Murray a leanúint ar Instagram agus TikTok ag @lisawiththefringe.
Féach freisin
[cuir in eagar | athraigh foinse]Naisc sheachtracha
[cuir in eagar | athraigh foinse]- Casadh sa Cheol ar TG4.[5]
Tagairtí
[cuir in eagar | athraigh foinse]- 1 2 3 Conor Torbóid (22 Iúil 2026). "Lisa Murray ar a singil nua 'Céim ar Chéim', Baddies Bhaile Ghib, agus a comhoibriú le club reatha" (ga-IE). NÓS. Dáta rochtana: 2026-07-25.
- ↑ "An stáitse Gaeilge ag an bPicnic Leictreach, Féile John Ford, Eagrán speisialta Blas Ceoil, Caint ar Bhruce Ismay agus Teach Chasla" (ga-IE). Tuairisc.ie (2025-08-22). Dáta rochtana: 2026-07-25.
- 1 2 3 extrag.ie (10 MF 2025). "Gaeilgeoir Swift: Chuaigh ceoltóir 'viral' le hamhrán Taylor" (ga-IE). Dáta rochtana: 2026-07-25.
- 1 2 3 Music Producers Guild / mpg.org.uk (2025). "Lisa Murray". Dáta rochtana: 2026.
- 1 2 3 TG4 (29.03.26). "Casadh sa Cheol | Caoimhín & Lisa Murray | Player | Irish Television Channel, Súil Eile" (as ga-IE).