Jacques Godbout

Ón Vicipéid, an chiclipéid shaor.
Jump to navigation Jump to search
Jacques Godbout
Dáta breithe 27 Samhain, 1933
  Québec, Ceanada
Náisiúntacht Ceanadach
Gairm Úrscéalaí, iriseoir, scannánaí, file
Seánra Litríocht do pháistí, aistí, úrscéalta, srl

Scríbhneoir é Jacques Godbout a rugadh i Québec, Ceanada ar 27 Samhain, 1933.

Ghnóthaigh sé céim mháistir san Université de Montréal sa bhliain 1954 le tráchtas faoi Arthur Rimbaud, agus ceapadh é ina léachtóir fealsúnachta agus Fraincise in Ollscoil Addis Ababa na hAetóipe.

D’fhill sé ar Cheanada i 1957 agus bhí sé ag obair mar scríbhneoir scripte le Bord Scannán Cheanada ó 1958–1960, ina stiúrthóir Fraincise (1970) agus ina léiritheoir agus ina eagarthóir. Bhí a ghairm mar fhile, úrscéalaí, fear aistí, drámadóir agus iriseoir á chur chun cinn aige an am céanna.

Jacques Godbout, 2014

Bhunaigh sé an reiviú Liberté i 1958. Foilsíodh trí leabhar filíochta dá chuid: Carton-pâte (1956), Les Pavés secs (1958) agus C’est la chaude loi des hommes (1960). Bronnadh an duais Prix Dupau ón Académie française air ar son a chéad úrscéil, L’aquarium (1962), agus an Governor General’s Literary Award i 1973 ar son Salut Galarneau! (1967).

I measc na leabhar eile a scríobh sé tá L’isle au dragon (1976), Les Têtes à Papineau (1981), agus Une Histoire américaine (1986) faoi chultúr Mheiriceá agus an Fhraincis i Meiriceá Thuaidh tar éis reifreann 1980. Foilsíodh Le Temps des Galarneau (1993) agus Opération Rimbaud i 1999. Ag an am céanna bhí scannáin ficsin agus faisnéise á ndéanamh aige, ina measc Kid Sentiment (1968), IXE-13 (1971), Deux épisodes de la vie d'Hubert Aquin (1979), Comme en Californie (1983), Alias Will James (1988), Le Sort de l'Amérique (1996) agus Anne Hébert (2000).

Ghnóthaigh sé an Prix Duvernay, an prix Belgique-Canada agus Eurofipa onórach i 1997 ar son a chuid scannánaíochta. Bhí sé ina stiúrthóir agus ina bhunaitheoir ar L’Actualité agus bhunaigh sé Cumann Scríbhneoirí Québec (UNEQ) (1977–1978). Tá sé ina fhoilsitheoir agus ar bhord stiúrtha Éditions du Boréal ón mbliain 1987 i leith.

2014

Mar iriseoir, bhí ábhar dá chuid i gcló sna hirisí seo leanas: Les Nouvelles Littéraires, Maclean's, Lettres françaises, L'Actualité, Le Jour, Cité libre, Parti pris, Vie des arts agus Le Devoir. Bhí sé ar bhunaitheoirí an ghluaiseacht Fhéinrialtais Mouvement Souveraineté-Association as ar tháinig an Parti québecois ina dhiaidh sin.

Rinneadh clasaic de chuid litríocht Québec de Salut Galarneau! go mear tar éis a fhoilsithe, mar gheall ar a ghreann agus a léargas géar ar scitsifréine lucht Fraincise Cheanada, a bhí ag maireachtáil ar nós na Meiriceánach, ach a dteanga agus a gcultúr féin acu i gcónaí. Tá cónaí air i Montréal.

Gaeilge[cuir in eagar | athraigh foinse]

I mí Mhárta 2012 chuir na foilsitheoirí Coiscéim leagan Gaeilge de Salut Galarneau! i gcló. Is é Iarla Mac Aodha Bhuí an t-aistritheoir.

Tagairtí[cuir in eagar | athraigh foinse]