Glór Ár Linne
| Cineál | tionscadal  | ||
|---|---|---|---|
| Fad ama | 8 seachtain | ||
| Eatramh imeacht | bliantúil | ||
| Tréimhse ama | 2025— | ||
| Tír | Éire | ||
| Eagraí | Raidió Rí-Rá | ||
| Teanga an tsaothair nó an ainm | an Ghaeilge | ||
| Seánra | ilseánrach | ||
| Suíomh gréasáin | https://www.rrr.ie/glor/ | ||
Is togra cothaithe ceoltóirí é Glór Ár Linne. Is iad lucht Raidió Rí-Rá a eagraíonn é. Tugann sé deis do dhornán bannaí agus ceoltóirí óga scileanna praiticiúla a fhoghlaim ó cheoltóirí a bhfuil fios na ceirde acu.[1][2][3][4]
Is saghas scéim luasghéaraithe é mar a chuirtear ceardlanna agus meantóireacht ar fáil do na bannaí óga a ghlactar leo, iad ag plé le ceisteanna amhail ceol a scríobh, a thaifead agus a léiriú, cur i láthair, margaíocht, agus an earnáil féin. Bítear ag súil leis go mbeidh píosa ceoil taifeadta ag gach rannpháirtí faoi dheireadh na tréimhse gur féidir leo a chur ar Spotify, ar an raidió srl.[3]
Cuireadh Glór Ár Linne ar siúl den chéad uair sa bhliain 2025. Beidh sé ar siúl arís san athbhliain.[4][5]
Meantóireacht
[cuir in eagar | athraigh foinse]Má tá sé níos fusa ceol a chruthú go neamhspleách sa lá atá inniu ann ná mar a bhíodh, is mó idir sin agus gairm a bhaint amach san earnáil. Mar chuid den togra seo, thar tréimhse ocht seachtaine tugann meantóirí a bhfuil taithí acu ar shaol an cheoil lámh chúnta do na ceoltóirí óga fáil faoi réir do na constaicí a ghabhann leis.[2][6]
Sa bhliain 2025 bhí deis ag na rannpháirtithe foghlaim ó na meantóirí seo a leanas:[6]
- Matt Ó Baoill (Tebi Rex)
- Megan Nic Ruairí (Bold Love)
- SexyTadhg
- Lauren Ní Chasaide (Bandia)
- Cian Mac Cárthaigh (IMLÉ)
Feidhm eile atá leis an dtogra ná muinín a chothú sna ceoltóirí. Mar a dúirt duine de na rannpháirtithe, mar shampla:
| “ | "Sular ghlac mé páirt in Glór Ár Linne bhí imní orm nach mbeadh lucht tacaíochta againn do na hamhráin a scríobh mé i nGaeilge. [...] Ach thug an scéim Glór Ár Linne muinín dom i mo chuid ceoil. Tuigim anois go bhfuil spéis ann. Agus cuireadh mé i dteagmháil le ceoltóirí eile leis na spéiseanna céanna. Táim thar a bheith buíoch as sin"
—Jessie Dingle (Jessie & the Veil)[2] |
” |
Bannaí 2025
[cuir in eagar | athraigh foinse]Bhí éileamh mór ar spásanna i nGlór Ár Linne nuair a fógraíodh é. Roghnaíodh sé ghrúpa agus ceoltóirí aonair as na hiarrthóirí le bheith páirteach sa togra, grúpaí a chleachtann stíleanna éagsúla agus "fuaim ar leith" ag chuile dhream acu. Is iad a bhí páirteach sa chéad bhliain ná:[1][2][4][7]
- Little Kings (banna acústach)
- Jessie & the Veil / Jessie Dingle (folk-rac draíochtúil)
- Éire agus Chulainn (ceol traidisiúnta)
- Aisling Moran (amhránaí/scríbhneoir amhráin)
- Earthmover (rac iarphunc)
- Lisa Murray (popcheol)
Cur chun cinn
[cuir in eagar | athraigh foinse]Chabhraigh Glór Ár Linne leis na ceoltóirí gigeanna a fháil i rith an tsamhraidh. Bhí sé de sprioc ag an dtogra ach go háirithe spás a fháil ar ardán na Collchoille ag an bPicnic Leictreach do pé bannaí a bhí réidh chuige faoi dheireadh an tréimhse.[3][4]
An Picnic Leictreach
[cuir in eagar | athraigh foinse]Is iad na sé rannpháirtí ar fad a d'éirigh leo a gcuid ceoil a chur i láthair sa Chollchoill sa deireadh sa bhliain 2025, ceolchoirm a rinneadh léirmheas dearfach uirthi i Scéal agus a bhfuil cuid de le feiceáil ar chlár teilifíse de chuid TG4 ón bPicnic Leictreach.[3][2][4][8]
Seó-thaispeántas
[cuir in eagar | athraigh foinse]Bhí ceolchoirm speisialta sa Grand Social i mBÁC ar an 17 Meán Fómhair mar sheó-thaispeántas de na ceoltóirí, le bar smaise a chur ar an gcéad bhliain den togra.[4][2]
Naisc sheachtracha
[cuir in eagar | athraigh foinse]- Suíomh oifigiúil: Glór Ár Linne
Féach freisin
[cuir in eagar | athraigh foinse]Tagairtí
[cuir in eagar | athraigh foinse]- ↑ 1.0 1.1 "Glór Ár Linne". Raidió Rí-Rá. Dáta rochtana: 2025-09-14.
- ↑ 2.0 2.1 2.2 2.3 2.4 2.5 Emma Ferrari (9 Meán Fómhair 2025). "Glórtha Nua Ár Linne". Scéal: lch 12.
- ↑ 3.0 3.1 3.2 3.3 Cearbhall Ó Síocháin (06 Márta 2025). "Raidió Rí-Rá ar an aer beo 10-17ú Márta". RTÉ.
- ↑ 4.0 4.1 4.2 4.3 4.4 4.5 "'The Irish language is a doorway, not a barrier': Glór ár Linne" (as Gaeilge ⁊ Béarla). RTÉ (11 Meán Fómhair 2025).
- ↑ "Glór Ár Linne" (as Béarla). The Journal of Music. Dáta rochtana: 2025-09-14.
- ↑ 6.0 6.1 Jenna Thompson. "New Irish-language music showcase Glór Ár Linne to take place in Dublin" (as Béarla). Hot Press. Dáta rochtana: 2025-09-14.
- ↑ Alan Corr (6 Meán Fómhair 2025). "Behind the music - Lisa Murray". RTÉ.
- ↑ Cóilín Duffy (29 Lúnasa 2025). "An Phicnic Leictreach 2025: an Ghaeilge ag croílár an deireadh seachtaine". An Páipéar (Eagrán 44).