Giovanni Falcone

Ón Vicipéid, an chiclipéid shaor.
Giovanni Falcone 1939-1992

Breitheamh Iodálach ab ea Giovanni Falcone (18 Bealtaine, 1939 - 23 Bealtaine, 1992) agus é ina ionchúisitheoir ina lán caingne faoi choireanna de chuid an Mhaifia. Sicileach ab ea Falcone féin, cosúil leis na fir a bhí á n-ionchúisiú aige, agus d'fhás sé suas i gceantar dearóil i bPalermo. Eisean a d'eagraigh na mórthrialacha - "na trialacha maxi" - thiar sna hochtóidí, inar baineadh admhálacha a gcuid coireanna as na céadta drongadóirí de chuid an Mhafia. Ba é an t-ollbhrathadóir Tommaso Buscetta a chuir ar chumas Falcone an t-éacht seo a chur i gcrích. Bhí Buscetta sásta a chuid eolais a nochtadh do Falcone, toisc go raibh luiteamas aige leis an mbreitheamh mar dhuine. Bhí sé den tuairim gurbh é Falcone an t-aon duine amháin de lucht an dlí a bhí sásta labhairt leis mar dhuine cothrom ar aon dínit leis féin.

Buama bobghaiste a mharaigh Falcone, agus é ag tiomáint a chairr go dtí Aerfort Idirnáisiúnta Palermo. Fuair a bhean chéile Francesca Morvillo agus triúr póilíní bás sa phléasc chéanna. Ba é Giovanni Brusca a mhaidhm an t-ábhar pléasctha, agus fuair sé an t-ordú ó Salvatore "Toto" Riina.

Bhí aithne mhaith phearsanta ag Giovanni Falcone ar Paolo Borsellino, an breitheamh Iodálach eile a fuair bás ó lámh an Mhafia faoin am céanna. Inniu, tugtar Aerfort Falcone-Borsellino ar aerfort idirnáisiúnta Phalermo i ndilchuimhne ar an mbeirt fhear seo.

"Níor mharaigh sibh iad. Tá a gcuid smaointí ag siúl ar ár gcosa." Mórshiúl i ndilchuimhne ar Giovanni Falcone agus Paolo Borsellino.