Dreigeoideach 2030

Ón Vicipéid, an chiclipéid shaor.

Tá na réalteolaithe ag tuar go sroichfidh dreigeoideach cuíosach mór comharsanacht an Domhain, agus go mb'fhéidir go n-imbhuailfidh sé leis an Domhan, i Meán Fómhair 2030. SG344 atá mar ainm ar an dreigeoideach seo, agus tá a lorg á leanúint ag réalteolaithe ar fud an Domhain. Meastar go bhfuil sé chomh mór le hárasán, 30-70 m ar trastomhas. Ní fios fós céard atá ann, oighear, gairbhéal scaoilte, carraigeacha móra, nó iarann. Más oighear nó gairbhéal atá ann is má bhuaileann sé leis an Domhan, dhealódh sé ó chéile agus dhófaí go hiomlán san atmaisféar é roimh dhromchla an Domhain a shroichint: ní chuirfeadh sé sin isteach ar an Domhan ar chor ar bith. Ach más carraigeach nó miotalach é, d'fhéadfadh pléasc cúpla meigeatonna tarlú, céad oiread níos cumasaí ná an buama adamhach a mhill Hiroshima na Seapáine i 1945: bheadh a leithéid inchurtha leis an imbhualadh astaróidigh a tharla i dTunguska na Sibéire i 1908.