Dífhibrilitheoir

Ón Vicipéid, an chiclipéid shaor.

Feiste chun turraing thomhaiste leictreach a sheoladh tríd an gcliabhrach is an croí chun rithim mhínormálta croí atá ag fibriliú a réiteach. Toradh ar ghalar na n-artairí corónacha a bhíonn sa bhfibriliú de ghnáth. Nuair a tharlaíonn fibriliú i gcás na méadailíní—fibriliú méadailíneach —ní dhéanann an croí an fhuil a chaidéalú i gceart tríd an gcolainn, ní bhfaigheann an inchinn dóthain oscaigine, agus faigheann duine bás go tobann. Is ar an mbealach seo a fhaigheann 75% de na daoine bás ar bás tobann cairdiach é. Thaispeáin an máinlia Claude Beck (1894-1971) i 1947 gur féidir an feidhmiú marfach croí seo a leigheas ach turraing thomhaiste leictreach a sheoladh tríd an gcroí luath go leor i ndiaidh tosú an fhibrilithe. Déantar seo anois le dhá leictreoid a chur ar dhá thaobh an chliabhraigh agus an turraing a sheoladh. Ba i mBéal Feirste a rinne Frank Pantridge (1916-2004) is a chomhghleacaí John Geddes dífhibrilitheoir a chur in otharcharr i 1966, rud a shábháil an-chuid daoine. Ina dhiaidh sin thóg siad dífhibrilitheoir iniompartha. In ainneoin na bhforbairtí móra maidir le dífhibrilitheoirí, is é an tubaiste nach sábháiltear ach céatadán an-bheag de na daoine a mbuaileann fibriliú méadailíneach iad, de bhrí go sroicheann an dífhibrilitheoir an t-othar ródhéanach. Is ar an ábhar seo a bhíonn dífhibrilitheoirí ar fáil in an-chuid ionaid oibre anois.