An Rúisínis Phanónach

Ón Vicipéid, an chiclipéid shaor.
Rúisínis Phanónach
(Руски язик Ruski yazik)
Á labhairt: An tSeirbia, an Chróit
Réigiún: Oirthear na hEorpa
Cainteoirí san Iomlán: 20,000
Rang: Ní sa chéad 100
Líne ghinealaigh: Ind-Eorpais
 Balta-Shlavais
  Slavais
   Slavais Iarthearach
    Seic-Slóvaiceach
     Rúisínis Phanónach
Stádas Oifigiúil
Teanga Oifigiúil: An Vóvaidín (cúige na Seirbia)
Foras Pleanála Teanga: Reacht na Vóvaidín
Cóid teangeolaíocha
ISO 639-1 gan cód
ISO 639-2 sla (B) rue (T)
ISO 639-3 rue
Amharc ar: TeangaLiosta Teangacha

Teanga Shlavach is ea í an Rúisínis Phanónach (bačvan'ska ruska bešeda/бачваньска руска бешеда) a labhraítear in áiteanna sa Vóvaidín agus in oirthear na Cróite. Tá stádas oifigiúil aici sa Vóvaidín. Tháinig Rúisínigh na Vóvaidíne ó oirthear na Slóvaice san ochtú haois déag, agus cé go bhfuil an chuid is mó de na teangeolaithe barúlach gur teanga Shlavach Oirthearach atá ann, nó fiú canúint Úcráinise, bhí na canúintí Rúisíneacha go leor chomh mór faoi thionchar na Slóvaicise agus go bhfuil teangeolaithe easaontacha ann a cheapann go bhfuil siad níos cóngaraí don tSlaivis Iartharach (an tSlóvaicis agus an Pholainnis mar shampla). Na hiarrachtaí a rinneadh i dtíortha éagsúla leis an Rúisínis a chaighdeánú, áfach, tharla siad beag beann ar a chéile, agus ní féidir a rá go mbeadh comhtheanga scríofa ag na Rúisínigh go léir.

Maidir leis an Rúisínis Phanónach, fuair sí caighdeán scríofa i dtús na seachtóidí. Tá an caighdeán sin bunaithe go hiomlán ar chaint na ndaoine i sráidbhailte Rúisíneacha na Vóvaidíne. Úsáidtear an aibítir Choireallach, maille le cupla litir bhreise atá le fáil in aibítir na hÚcráinise freisin (Ґ ґ, Ї ї, Є є), ach cé go bhfuil aibítir an dá theanga sách cosúil le chéile, ní hionann í.

Tá an Rúisínis Phanónach ó dhúchas ag fiche míle duine, agus is é Ruski Kerestur lárionad cultúrtha na Rúisíneach sa tSeirb. Tá cónaí ar chúig mhíle duine i Ruski Kerestur, agus is Rúisínigh iad a bhformhór. Tá an teanga á staidéar agus á taighde in Ollscoil Novi Sad, agus freastlaíonn stáisiún raidió Novi Sad ar lucht labhartha na Rúisínise chomh maith leis na mionlaigh éagsúla eile sa Vóvaidín.