An Réabhlóid Ghlórmhar

Ón Vicipéid, an chiclipéid shaor.
Liam Oráiste, agus saighdiúirí na hIsiltire ag teacht i dtír ag Torbay, i ndeisceart Shasana

Tugtar an Réabhlóid Ghlórmhar ar an réabhlóid sa bhliain 1688 a ruaig an Rí Séamas a Dó as ríchathaoir Shasana agus a chuir Liam a Trí de mhuintir Oráiste-Nassau ina áit. Ba é John Hampden a bhaist an réabhlóid mar sin, agus an bhliain 1689 ag druidim chun deireanais, agus is ainm é a thugann Parlaimint Shasana ar na himeachtaí seo go hoifigiúil.

Uaireanta, deirtear gur réabhlóid gan doirteadh fola a bhí ann, ach ní fíor é. Le fírinne, bhí scirmisí idir an dá arm, agus bhí scliúchais fhrith-Chaitliceacha in áiteanna. Thairis sin, cuireadh Cogadh an Dá Rí in Éirinn, agus troideadh cúpla mórchath in Albain, go háirithe i gCoille Chnagaidh (cath Raon Ruairidh, mar a thugtar air i nGaeilge na hAlban) agus i nDùn Chaillinn.